上屆決賽翻版
明日早上喺加拿大舉行嘅女子世盃決賽爆發「美日大戰」，由美國女足硬撼衞冕嘅日本女足，合演上屆決賽翻版。雖然美國有女神雅歷絲摩根壓陣，但其老拍檔雲芭芝跌晒Watt兼失去正選，令「美女」兵團火力大減，撞番欠缺霸氣、場場煲魚生粥嘅「大和撫子」，「細」均力敵下隨時處於拉鋸，加上歷屆決賽旺細盤，值得再追。(中央5台周一早上7時直播)
美女兵團火力減
女人一向最記仇，斯維唔會懷疑美國復仇嘅心，尤其係首席女神雅歷絲摩根，佢上屆後備入替先開紀錄，眼見冠軍在望，點知完場前被日本扳平，加時各入一粒未分高下，最終卻射輸12碼，對出道冇耐嘅摩根BB嚟講都咪話唔傷心，所以今仗再遇「大和撫子」，為免重蹈覆轍，必定踢得更加謹慎。
今屆「美女」兵團除咗首仗贏澳洲3比1外，其餘賽事都係入一球起、兩球止，而且摩根BB嘅前線拍檔雲芭芝又跌晒Watt，今屆只入1粒，自16強對哥倫比亞極刑宴客後，呢位35歲老將連續兩場失去正選，無疑加重咗摩根BB嘅負擔，好彩門神蘇露有上晒身演出，連續5場保持清白之身，不過咁亦難掩前線火力不足嘅問題。
大和撫子失霸氣
查實日本亦唔好得幾多，上屆神射手兼最佳球員嘅36歲前鋒澤穗希不復當年勇，連續3場屈居後備，陣中又冇人能頂替呢位靈魂人物嘅地位，無論係大儀見優季、岩淵真奈定菅澤優衣香，都唔係嗰種級數，後者更因傷上陣成疑。雖然「大和撫子」今屆6戰全勝，但場場都係只能淨贏一粒咁大把，好似上仗就係靠英格蘭守將芭絲迪擺老烏先至符碌贏2比1，毫無上屆盟主嘅霸氣，面對矢志復仇嘅「美女」邊敢搶攻？
女子世盃之前舉行咗6屆，歷屆決賽除咗首屆外，之後5屆法定時間全部開細，反映嚟到決賽場合，大家先求唔輸嘅保守心態，況且日本今屆大細興玩單跳，上仗開完大後，照攤路今仗應該開番細，斯維認為有1.5倍嘅入球細係穩陣之選。
