聽朝有多場美職直播賽事，不過科娜最關心嘅都係洛杉磯銀河主場對FC多倫多呢場波，因為我最愛嘅利物浦「神奇隊長」謝拉特已經展開其全新嘅「銀河之旅」，雖然佢未有咁快落場，不過都會入場做吓功課，睇吓銀河呢隊波同自己夾唔夾（口架）嘛！銀河過去三場主場場場大勝，今場有埋「謝四」撐場，主勝同大盤唔怕追！（TVB 301周日早上10時30分直播）

謝拉特上月尾已抵達洛杉磯，展開足球生涯新一頁，雖然矚目程度唔及當年碧咸，但佢比碧咸更得球迷歡心，日前佢同屋企人去咗間餐廳食晚飯，畀大批粉絲同記者發現，「謝四」勁nice咁企定定任影唔嬲，難怪有粉絲大叫：「你好人過碧咸！」

銀河主場火力恐怖
有咗呢位星級戰將加盟，銀河一班球員當然勁興奮，今場對FC多倫多加多幾錢肉緊踢場好波畀佢睇。雖然多倫多成績唔錯排喺東岸第3位，但美職不嬲都係西岸球隊較強，而且銀河近三仗主場表現實在太恐怖，每場都至少入5球，夾埋入咗16球，所以睇怕多倫多都係頂唔到。另外兩軍近六次對賽全開大，今場入球大都捧得過。