澳職今季爭逐勁激烈，榜首位置換完一隊又一隊，今季分別做過「一哥」嘅FC悉尼同布里斯班獅吼今日交鋒，夠晒睇頭！FC悉尼今季只識贏同省球隊，對住其他省球隊一場不勝，反而獅吼有踢完U23亞洲盃嘅射手回歸，有力贏波洗頹風，3倍客W有肉食！

（有線64及203台周六下午4時30分直播）

FC悉尼有個好奇怪數據，今季贏嗰7場波，全部嚟自位於新南威爾士省嘅球隊（西悉尼流浪者、中岸水手、紐卡素噴射機），其餘9場只得6和3負劣績，今場對獅吼唔似可以贏波囉！況且，FC悉尼前鋒保斯基養傷，上場聯賽輸波令5場不敗走勢斷纜，輸完再輸唔出奇。

獅吼早前坐咗差唔多1個月榜首，但自從3名主將離隊為澳洲U23踢亞洲盃，近2場聯賽突然潰敗，分別輸0:4及1:4。好在澳洲U23提早出局，首席射手占美麥卡倫、班頓波里路同後衞占士當拿治強勢回歸，有望幫球隊回復霸氣，作客亦可投信心一票。