U23亞洲盃終於嚟到決賽階段，東亞兩大龍頭日本U23同南韓U23爭奪冠軍，呢對世仇都抱住只能贏唔可以輸嘅心態，壓力奇大，冇乜可能搏拳，1.83倍半場和抵玩。

（now671周六晚10時45分直播）

由於兩隊都攞到里約奧運入場券，今場雙方爭嘅冠軍名銜，實際上只係虛名同本身嘅尊嚴。從U23對賽往績去睇，南韓取得6勝4和4負，最近兩隊响呢個年齡層交鋒，南韓U23更加兩戰全勝，包括2012倫敦奧運嘅銅牌爭奪戰，所以表面而言南韓主W值得一博，問題係呢批有利南韓嘅數據，查實並唔係由今次對賽嘅球員創造，根本冇乜絕對嘅參考價值。

薩爾斯堡抽走雙方主力
以今屆表現嚟睇，日、韓勢均力敵，而且呢場波大家都畀奧地利超聯強隊薩爾斯堡抽走咗件主力，日本冇咗件鋒將南野拓實，南韓就少咗9號仔黃喜燦，一齊打少隻車。不過，黃喜燦雖然冇波入，但係佢嘅創造力同助攻，公認係南韓U23嘅進攻泉源，冇咗呢件19歲細路，「太極小虎」所受打擊當然大過「小藍武士」。

但係南韓U23仲有柳承佑、文昶辰同權昶勳呢個攻擊鐵三角，日本U23主帥手倉森誠已經點名一定要凍結柳、權呢兩個人，打法上肯定偏向穩陣為主。南韓U23本身亦好忌憚日本U23嘅淺野拓磨、安拿胡阿道、「京都U18黃金世代」久保裕也、原川力幾個，即使對手前鋒鈴本武藏傷咗，都未必敢沿用對卡塔爾嘅343攻擊陣式。

太極教頭逢日不敗
最關鍵係南韓U23教頭申台龍原來响職業生涯，無論踢波定教波帶隊，都未輸過畀日本人，佢唯一目標自然係保持紀錄兼贏埋，點會立亂同日本U23搏拳吖，兩隊半場打和真係唔奇。