英超「三哥」阿仙奴連續3場聯賽不勝，今晚喺英足盃主場出擊對英冠般尼力圖贏波重振士氣。不過，排喺英冠第3位嘅般尼近況弗爆，今場作客未必會踢得保守，兩隊鬥攻下估計入波唔會少，推介大盤。

（周六晚11時開賽）

阿仙奴近3場聯賽只錄得2和1負跌咗7分，不但將榜首位置讓畀李斯特城，就連曼城都藉較佳得失球壓過佢哋，主帥雲格點會唔嬲到震。「兵工廠」上仗輸畀車路士同早段有中堅梅迪薩卡被逐有關，佢今晚雖要停賽，但相信兵工廠仍主動搶攻，務求贏波洩憤，以基奧特、奧斯爾同阿歷斯山齊士嘅攻擊組合，要入波難度唔大。

對手般尼近期連贏4場近況弗爆，而且狂轟14球只失3球，一眾中前場球員好似安達格雷、禾基斯、佐治保迪、祖爾巴頓同洛雲軒寧斯近期頻頻有波入，今仗作客冇壓力下應該唔會死守，對住有梅迪薩卡停賽嘅阿仙奴防線亦有力爭取士哥，阿謙估計今仗隨時上演入球騷，一於捧大盤。