今季法甲錦標基本上已成巴黎聖日耳門囊中物，其他前列球隊餘下目標，都係為爭奪下屆歐聯入場券而戰。今周排第五嘅昂熱主場對「二哥」摩納哥，屬歐聯資格「6分波」，相信兩軍都會去盡求勝，一於揀2.48倍入球大。

（TVB 302、now 714周日凌晨零時直播）

新升班嘅昂熱今季令人驚喜，一度殺上頭兩位，即使近期走下坡，仍排喺第5。昂熱勝在冇歷史包袱，放開懷抱大踢悅目足球，上仗作客班霸巴黎聖日耳門，都毫不退縮，結果大敗1比5，戰術上係失誤，但欣賞指數高。昂熱作客鬥勁旅，都豁出去唔怕輸，返主場更加進取，中場派歷克卡比尼（圖）近3場聯賽都有波入，今仗可望再有斬獲。

次席摩納哥狀態亦弗，已保持9場聯賽不敗，上仗更大炒圖盧茲4比0，佢哋攻擊點夠多，今季已有14位球員取得入球，連後衞法賓奴泰華利斯都有4球進帳。摩納哥殺得性起，作客同昂熱一於鬥攻。

里昂狙擊頹兵巴斯蒂亞
另一場巴斯蒂亞主場對里昂，巴斯蒂亞中場美迪莫斯達化、施高科芬拿停賽，前鋒拉斯賓天奴因傷缺陣，陣容不整，加上喺法足盃及聯賽連續受挫，球隊士氣低沉。里昂可以乘虛而入，捧客勝。

（TVB 302周日凌晨3時直播）