近期全面回勇嘅祖雲達斯，今晚喺意大利盃4強首回合，主場擺陣硬撼國際米蘭。祖記今季開局唔多順，但係自從10月尾之後，喺本土賽事就未輸過，近期更係連贏13場！不過，「老婦人」近期先後鬥拉素、羅馬兩支硬嘢，都係小勝1粒，今場對國米都唔慌贏得多，梗係繼續追入球細啦！

（開賽時間：周四凌晨3:45）

祖雲達斯國內賽13連勝
祖記開季唔知咩事，表現曳到爆，但係踏入11月成隊波翻生，喺意大利國內賽事13場比賽全勝！佢哋最近仲有射手文迪蘇傑傷愈復出，但係始終都係啱啱傷好，狀態仲未係十足，教練阿里基未必會放佢打正選。連贏13場當然叻仔，但係「老婦人」對上兩場都要對硬嘢，同樣小勝拉素、羅馬各一粒，相信今場有主場之利，都唔會出現大量入波。

國米喺意盃8強作客2蛋贈意甲1哥拿玻里，但係返到意甲主場鬥卡比，打多個都畀對手喺完場前逼和1:1，表現好唔穩定。首回知佢哋作客都靈球場，一定唔敢輕出進攻，加上對上6次作客祖記4次開入球細，所以今場變入球騷可能性不大，入球細係上上之選。