英聯盃4強次回合賽事，「紅軍」利物浦返到主場迎戰史篤城，紅軍喺首回合作客贏1比0，為保優勢今場料會穩陣行先，而史篤城近6次作客利物浦有5場開出入球細，科娜一於再追細盤！

（TVB 301周三凌晨3時45分直播）

利物浦上場英超嚇死人，作客諾域治險勝5比4，反勝為敗再反敗為勝，跟住再被逼和，最尾靠拉爾拉拿喺補時最後1分鐘絕殺成功，如果有利迷嘅心臟冇咁好，真係分分鐘會心臟病發，據講瑞典有兩名利迷賽後high到不斷尖叫同拍打物件，搞到鄰居以為隔籬屋發生暴力事件而報警添！

紅軍喺首回合作客贏史篤城1比0，英聯盃4強賽制係90分鐘唔計作客入球，但一旦進入加時，作客入球優惠條例就會實施，到時蝕底嘅就係利物浦，再加上紅軍賽程密到暈，今場係佢哋今個月第8場波，踢加時分分鐘腳軟唔夠史篤城砌，所以今場一定要保住首回合嘅領先優勢，以守為先避免失波，要知道唔係場場都咁易畀利物浦反敗為勝！再講，香港天寒地凍，利物浦巿都唔暖得去邊，睇埋天氣預測呢場夜波仲可能有雨，又濕又凍影響發揮，估計入波都係一球起、兩球止。

史篤城今場有翼鋒約拿芬禾達斯因傷缺陣，而另一翼鋒阿拿奧杜域喺上場英超因腿筋拉傷缺陣，今場雖然有望復出，但都唔好對呢位「奧地利伊巴」有太大期望，因為佢同保贊、梳頓沙基利呢幾位大牌進攻球員一樣，踏入新一年零士哥，狀態明顯下滑，史篤城今場想入波反勝出線並唔易。史篤城領隊曉士透露，後防大將梳爾哥斯可望擺脫傷患上陣，有助加強防守力，球隊近6次到訪晏菲路球場有5場開細，今場一於再追！