今晚英超壓軸戰倫敦打吡，阿仙奴主場硬撼車路士，兩軍太多牙齒印堅重火藥味，車仔喺新帥希丁克帶領下，有番鬥心誓做攔路虎，而且希帥過往剋住阿仙奴，兵工廠近排連番失分，榜首位置未坐穩，預計會穩陣行先唔敢冒進，雙方近7次交手6度開入球細，細盤值得追多鋪。
（now 621周一凌晨零時直播）
阿仙奴最憎嘅倫敦死敵係熱刺，但領隊雲格頭號仇人，點計都係車仔前領隊莫連奴，兩人先後15次交手，雲格只獲1勝6和8負，畀對方寸係「失敗專家」，上次聯賽交鋒，車仔前鋒迪亞高哥斯達出奸招搞到阿仙奴基比爾包列斯達被逐，兵工廠因而輸波，令雙方牙齒印加深，就算如今阿仙奴成績拋離對方，而車仔有「寸王」被炒兼淪落到第14位，仍不減今仗火藥味。
車仔自希丁克去年12月中接手後，近7仗錄得3勝4和未輸過，總算止住頹勢，其中2仗作客均保不失，證明眾將都肯為希帥賣命。王牌夏薩特今仗有望復出，另一主力韋利安賽前亦話贏到阿仙奴，係提升信心嘅好機會，可見佢哋唔會因排名相差咁遠而hea踢。查實希丁克於09年同樣中途上「車」，喺英足盃及聯賽兩度擊敗阿仙奴，有啲剋星味道，阿仙奴主帥雲格不得不防。
近7次對碰6開細
阿仙奴近2仗聯賽分別打和利物浦及史篤城失分，令到榜首形勢拉緊，儘管今仗有奧斯爾及阿歷斯山齊士復出，不過後者久疏戰陣未弗，相信只會先任後備。正所謂打吡戰實打甩髀，加上阿仙奴為保爭標希望，必定踢得小心謹慎，過去7次交手有6次開細盤，包括近4次碰頭全細盤，今仗細盤有1.8倍追得過。此外阿仙奴近4仗賽事都開半場和，不妨兼投。
