實力超晒班 抖多你一日
今晚上演嘅最後兩場U23亞洲盃8強，頭場C組首名南韓U23出戰D組次名約旦U23，南韓U23表現突出，連贏首兩場分組賽，提早取得出線權，因此上仗收起大部分正選休息，留力淘汰賽搏殺。相反約旦U23上仗同澳洲U23踢生死戰，最終僅僅守和驚險出線，球員搏到殘之餘，仲比南韓少抖一日，體力更加輸蝕，當然揀南韓U23主W。

（now671周六晚9時30分直播）

約旦激戰澳洲元氣大傷
南韓今屆賽事踢得好順利，首仗以2比1擊敗烏茲別克後，再以5比0大炒也門，根本未受考驗。球隊提早獲得8強席位下，上仗收起多位正選，包括今屆合共攻入5球嘅權昌勛、文昌鎮，對住上屆冠軍伊拉克U23，照樣全場佔優並先開紀錄，直至補時先至被逼和1比1，可見南韓仲有大把貨賣，今仗出番主力必演真功夫，要過約旦呢關並唔困難。

約旦今屆自從第一場贏「魚腩」越南3比1之後，其餘2場都打和0比0，踢法非常被動，消耗體力亦較多，特別係上仗面對澳洲硬朗壓迫一度陷入苦戰，幾經辛苦先至守和攞到出線資格。加上約旦比南韓遲一日完成分組賽，匆匆又要踢呢場硬仗，未必回得切氣，加上整體實力又不及南韓，各項條件都輸蝕下，前景睇淡，必捧南韓U23主W。

伊拉克客W值捧
另一場8強，阿聯酋U23對伊拉克U23，雖然阿聯酋係D組首名，但3戰只入4球，而且有兩球係對手「送禮」擺烏龍，表現有欠說服力。伊拉克貴為上屆冠軍，經驗方面佔優，預計可以擊敗阿聯酋U23，捧客W。

（now671周日凌晨零時30分直播）