(六)3 諾域治 vs 利物浦
利物浦近期賽程密麻麻，周中先踢完英足盃第3圈重賽，今晚英超早場又要作客「金絲雀」諾域治。紅軍喺英足盃靠小將贏波晉級，一班主力總算有得抖吓，今場面對3連敗共失9球嘅諾域治，客勝值得捧場。
（now 621周六晚8時45分直播）
利物浦真係呢期最「紅」，英超、英聯盃以至英足盃都有佢哋份，利物浦迴聲報做咗個統計，發現紅軍喺12月同1月嘅賽程，屬全歐洲最密嘅一隊，每場比賽之間平均得2.9日休息，其他英超球隊好似曼聯同阿仙奴都有4.1日，所以上場英足盃重賽，領隊高普派出大量生牯仔上陣，等班主力抖夠踢今場。
諾域治頹爆3連敗
紅軍今場繼續有中場菲臘比古天奴、中堅史卡迪爾及洛夫雲等主力缺陣，好在隊長佐敦軒達臣傷愈後狀態不俗，巴西兵羅拔圖法明奴擔任「假9」前鋒，比賓迪基踢單箭頭更好，攻勢更流暢。上場英超對曼聯，紅軍差唔多全場撳住對手嚟砌，贏唔到波只因把握力差，但今場面對頹爆嘅諾域治，應可贏波反彈。「金絲雀」近3仗全敗，3場皆失3球，包括上場對住同係升班球隊嘅般尼茅夫都吞3蛋，狀態曳極，今場仲有中場加利奧尼爾坐波監，都係揀番紅軍好過。
