猛虎出柙 直撲伊朗U23
U23亞洲盃8強，B組首名日本U23對A組次名伊朗U23，日本上仗穩奪首名出線權之下，派出副選仍然取勝，足證整體人腳質素高，狀態亦處於巔峰，加上主將獲得充足休息，今仗猶如猛虎出柙，氣勢更旺盛。伊朗防守不穩，難以招架，直取日本U23主勝。（now 671周五晚9時30分直播）

日本分組賽3戰全勝入7球只失1球，可謂攻守兼備，好有冠軍相。呢支「足球小將」最犀利嘅地方係人腳鼎盛，外流歐洲搵食嘅瑞士超年青人前鋒久保裕也、奧地利薩爾斯堡射手南野拓實，固然有卡士，效力日職廣島三箭嘅淺野拓磨，以至兩位有黑人血統嘅前鋒鈴木武藏、佐佐木阿道，都屬於高質素球員。日本U23後備兵亦好打得，領隊手倉森誠上仗收起遠藤航、岩波拓也、原川力、鈴木武藏等多位主力，甚至派後備門將杉本大地把關，都以2比1擊敗上屆亞軍沙特阿拉伯，將對方踢出局，日本今仗應會派番強陣出擊，勝算更高。

伊朗防守弱 中龍就「叫胡」
伊朗U23上仗生死戰，對住實力不濟嘅中國U23，僅贏3比2，近兩仗失4球。值得一提，中國全場僅3次射門都入兩球，可想而知，對住伊朗只要射門中目標就可以「叫胡」。日本攻力屬於今屆賽事數一數二，伊朗後防肯定有難。