今日下午澳職獨腳戲，「一哥」布里斯班獅吼主場迎戰阿德萊德聯。獅吼在前線孖寶占美麥卡倫同班頓波里路為澳洲出征U23亞洲盃後，連續2仗作客聯賽都要失分，仲要一球不入，影響極大，相反「阿聯」挾7場不敗之勢，造訪冇牙獅吼有力全身而退，有得受讓咁筍，必揀讓球客勝。（有線64及203台周五下午5時直播）

獅吼兩名鋒將占美麥卡倫同班頓波里路，近日要代表澳洲出戰U23亞洲盃而缺陣，該隊今季聯賽攻入22球，呢對前線孖寶就包辦當中嘅12粒，協助球隊殺上榜首，兩人表現舉足輕重。不過，呢兩位「小袋鼠」去咗踢太公波後，獅吼立即跌Watt，近2仗聯賽只獲得1和1負，仲要一球都入唔到，影響力可見一斑，其中上仗慘敗墨爾本勝利腳下，獅吼毫無還手之力，冇晒「一哥」風範，依家僅以1分領先第2同第3位的西悉尼流浪者和FC悉尼，壓力咁大，隨時進一步影響發揮。

近況弗作客受讓值捧
對手阿德萊德聯自從去年11月尾擊敗珀斯光輝打開勝利之門，聯賽已7仗不敗，當中贏咗5仗，雖然「阿聯」作客成績始終較弱，開季作客7仗只係贏過排尾2嘅光輝，但之前造訪「二哥」西悉尼流浪者成功守和0比0，似乎要贏佢哋都唔容易，今仗撞正鋒線死火嘅獅吼，相信可以頂住唔輸，讓球主客和仲受讓一球，撐「阿聯」讓球客勝。