加利尼維利出任華倫西亞新帥已經超過1個月，雖然佢仲未能帶領球隊喺西甲聯賽開齋，但「蝙蝠軍團」踢盃賽就另一回事，表現相當Sharp醒。今晚華倫喺西班牙盃8強首回合主場迎戰拉斯彭馬斯，相信班波會把握呢個殺入歐洲賽嘅最後希望，實行同對方死過，即使讓半一照撐1.76倍上盤。

（開賽時間：周五凌晨3:00）

拉斯彭馬斯出名作客蟲
加利仔自從喺上年12月初出任華倫教頭後，聯賽同盃賽表現可謂差天共地，班波踢咗6場西甲仲未識贏，偏偏喺西盃戰線一帆風順，3戰全勝之餘，合共攻入9球兼零失球。講真佢哋家陣喺西甲跌至第11位，同排第6嘅伊巴差9分，追上去機會唔大。所以西班牙盃已經成為球隊獲得下屆歐戰資格嘅最後機會，唔到佢哋唔搏老命。

況且對手拉斯彭馬斯出名係作客蟲，雖然話佢哋上一圈作客勇挫伊巴3:2，但喺聯賽作客仲未能打開勝利之門，9場波拎得3分仲要係西甲最差，就知班波作客勁唔穩定，演出隨時打折。再者拉斯彭馬斯今季作客未試過保持清白身，呢鋪對住近5次主場至少轟入對手2球嘅華倫西亞，仲邊有得走吖！