李城捱到殘冇力衝「刺」

李斯特城喺今晚英總第3圈，主場同熱刺進行重賽。狐狸近期表現有啲脫力，上場連榜尾球隊阿士東維拉都贏唔到，相反熱刺上場4:1怒炒新特蘭，士氣如虹，今場仲唔食住個勢「捕狐」？2.25倍客勝玩得過！

（開賽時間：周四凌晨3:45）

李斯特城今季表現出色到爆，意想不到成為聖誕冠軍。不過，自從拆禮物日作客1球不敵利物浦後，狐狸表現開始回落，連同上場畀維拉逼和0:0在內，佢哋近5仗已經有4場和波，就連破咗英超連續入波場數嘅射手占美華迪，腳風都好唔順。雖然佢哋今場得中場馬菲占士一件傷兵，但係近期大戰連場，一班狐狸兵都有啲疲態，領隊雲尼亞里收起部分主力，專心攻聯賽都唔奇。

熱刺勝在板櫈夠厚
狐狸冇力，兵源遠勝對手嘅熱刺就愈踢愈起勁。熱刺雖然今季喺英總、英超兩次主場對李斯特城都贏唔到，但係佢哋上場怒炒新特蘭4:1，一班球員都活力充沛，唔似得狐狸得個勢又惡唔出樣。賴恩美臣、賓達納兩位中場仲抖緊，但係熱刺咁多人，對住開始捱到殘嘅李斯特城，贏波晉級應該唔難。