今晚英超獨腳戲，由「天鵝」史雲斯主場硬撼「大黃蜂」屈福特。「天鵝」今季內部立立亂，成班波冇晒信心谷極唔起，近11仗聯賽僅1勝淪落到要護級，相反「大黃蜂」升班後表現突出，箭頭恩哈路及領隊科里斯更包辦上月英超最佳將帥，一黑一旺有辦你睇，「大黃蜂」仲有得受讓咁筍，讓球客勝咪錯過。

（now 621周二凌晨4時直播）

球隊同人一樣都係有三衰六旺，以前被稱為「英超巴塞」嘅史雲斯季初仲好哋哋，點知自上年9月中後突然大跌Watt，上季帶領「天鵝」殺上第8位嘅主帥蒙克於12月被炒，有傳佢同球員唔咬弦，最弊係史雲斯高層炒人後並冇後着，傳過「瘋子」比爾沙、阿積士教頭法蘭迪保亞接手，但只聞樓梯響，最終只係搵看守領隊阿倫居迪斯教到季尾。呢位老人家亦冇乜計仔，教咗7仗錄得1勝2和4負，包括英足盃遭乙組仔牛津聯踢出局堅肉酸，連埋蒙克未走，史雲斯近11仗聯賽贏得1仗咁大把，依家眾將信心盡失，難怪排第18名被捲入降班漩渦。

恩哈路「蜂」芒畢露
另一邊廂，今季先升上英超嘅屈福特，喺前馬體會主帥科里斯領導下，現企穩中游位置，單計上月就贏過利物浦及打和車路士，令人喜出望外，箭頭恩哈路更試過連續6仗有士哥，弗到冇朋友，令佢同科里斯獲選英超上月最佳球員及領隊。雖然「大黃蜂」今個月聯賽連敗畀曼城及修咸頓，但表現唔曳，尤其對「藍月亮」3分鐘內遭反勝堅唔抵，今仗勢必搵史雲斯出氣。況且「天鵝」前鋒阿休已9仗食白果，今仗更有右閘基爾洛頓坐波監，相反屈福特有後衞尼敦阿基刑滿復出，仲有得受讓必揀讓球客勝。