雖然好多球迷都鍾意玩番兩手，但睇波同博彩絕對係兩回事，千祈唔好感情用事，如果唔係同將錢掟落鹹水海冇分別。今日重心推介場次，係英超「一哥」阿仙奴作客史篤城，論往績明顯係一場下盤波，切忌因阿仙奴嘅名牌效應而亂咁舂個頭埋去，史篤城呢個下盤不容錯過。

（now 621周一凌晨零時15分直播）

肥叔自問愛國，不過講到買波就不可咁盲目，亦曾喺專欄不諱言見親中國任何級別嘅比賽，一係避一係反，因為明知佢哋實力唔掂，無謂掟錢落鹹水海喇。前晚U23亞洲盃A組次輪，中國U23要硬撼敍利亞U23，由於兩軍首輪同告敗陣，為保出線希望必盡力爭勝，因此好多對國奧有情意結嘅球迷，諗住生死戰必搏紛紛落注力撐，令中國U23開波前不斷落飛，平手盤由最初嘅1.86倍跌至1.78倍，但大戶郁都唔郁，擺明落飛純粹係「盲目飛」，最終中國U23打少個之下反輸1比3，但對肥叔嚟講係意料中事。

阿仙奴5訪史城未贏過
今晚英超尾場「兵工廠」阿仙奴作客史篤城，前者貴為聯賽「一哥」實多捧場客，但肥叔見到初盤佢哋要讓半一之餘，仲有逾兩倍咁高水，嚇到個心離一離，明顯係熱唔透。有睇開英超嘅球迷應該知道，史篤城主場乃阿仙奴「凶地」，近5次聯賽造訪史軍，竟然錄得2和3負未贏過，數據唔會呃人。而且史篤城已非吳下阿蒙，今季喺主場先後擊敗車路士、曼城及曼聯，唔係人咁品，加上往績咁堅，受讓半一咁筍，真係有買趁早。