新一年足智彩決定開設比甲，為一眾波友提供更多選擇。比甲剛結束近3個星期嘅歇冬假重燃戰火，今晚將會上演亨克主場鬥華雷根。為咗爭入前6名，亨克喺歇冬期間簽入嘅新兵質素唔錯，實力大增有望小勝華雷根，博1.7倍主W之餘，玩埋2.02倍入球細。

（開賽時間：周六凌晨3:30）

亨克今季聯賽開季主場曾經一度連贏5場，可惜其後無以為繼，取得1勝1和3負。仲有呀，亨克火力麻麻，21場聯賽過後只係攻入23球，就連排尾二嘅奧特海維利都入多過佢哋5球。有見及此，亨克早前引入彭拿典奈高斯前鋒卡雷利斯、薩克達進攻中場馬利路夫斯基，呢2件新兵質素幾好，有望增強成隊波嘅創造力，取得新年第1勝。

華雷根翼鋒科廉停賽
至於對手華雷根歇冬前雖然走勢唔差，連續4場聯賽不敗，作客榜首真特亦曾打成2:2，表現絕對唔失禮。可惜隊波喺歇冬期間未有太多收購，只係引入丹超球隊阿爾堡守將達斯格特，實力冇乜改善，更何況今仗有翼鋒科廉停賽，喺亨克地頭睇怕難逃一敗。