今晚U23亞洲盃展開A組次輪賽事，頭場由中國U23硬撼敍利亞U23。雙方同病相憐，齊齊於首仗出師不利，為博入8強勢必大駁火爭勝，中國U23有中場主將馮剛刑滿復出，但佢哋依然慣性末段因「莫氣」跌Watt，主W唔多穩陣，2.35倍入球大更加值博。

（now 671周五晚9時30分直播）

中國U23於A組首輪對東道主卡塔爾U23，在廖力生先開紀錄下，下半場突然走晒樣，最終反輸1比3，完場前徐新更踢人做埋「紅牌阿姑」，今仗要停賽。雖然開壞咗個頭，但中國U23亦有好消息，中場主力馮剛坐完波監可復出，可填補徐新空缺兼加強攻力，而受傷的廖力生及張玉寧亦會紥住頂硬上。由於敍利亞U23於首輪以0比2不敵伊朗U23，兩軍為保出線8強希望，今仗碰頭必搏甩髀搶W，鑑於中國球員經常出現體力不繼問題，上仗末段跌Watt反勝為敗有辦你睇，因此中國U23主W唔多值博，既然兩軍力爭取勝必盡地一煲，鬥攻格局下一定多波入，大盤不容錯過。

伊朗質高夠贏卡塔爾
同組另一場，東道主卡塔爾U23迎戰伊朗U23，儘管雙方可坐山觀虎鬥，按頭場「中敍戰」戰果睇定嚟踢，不過以波論波，伊朗U23明顯技勝一籌，尤其係首仗對敍利亞U23舞龍咁舞先開紀錄嘅前鋒摩達哈利弗到爆燈，淨係呢位去年伊朗最佳年輕球員，就可玩到卡軍防線氹氹轉，客W值得捧場。

（now 671周六凌晨零時30分直播）