美斯率黃金戰友誓破魔咒
美洲國家盃今晚爆發終極決賽，由東道主智利火併大熱門阿根廷。阿根廷球王美斯為咗彌補上年失落世盃嘅遺憾，決心率領阿古路、迪馬利亞等「黃金一代」，協助「潘帕斯雄鷹」捧盃，有傳智利王牌阿歷斯山齊士有傷仲未好番，仲唔趁佢病攞佢命咩？為阿根廷終結22年來大賽無冠嘅魔咒，兼榮升世界第一，斯維今次力撐阿根廷「奪冠」。（now 681周日凌晨4時直播）

A山負傷智利頭痕
2005年夏天，初出道美斯與薩巴列達、阿古路、加雷等為阿根廷拿下世青盃，美斯從此平步青雲；3年後北京奧運，美斯聯同上述戰友，加埋迪馬利亞、羅美路、拿維斯、班尼加等奪得金牌，而這一脫球員亦被稱為「黃金一代」。不過成為大國腳後就與大賽冠軍絕緣，最接近係去年殺入世界盃決賽，卻輸畀德國屈居亞軍。難得今屆殺入美洲盃決賽，自然要彌補上年失落世盃嘅遺憾。阿根廷今屆連挫烏拉圭、哥倫比亞、巴拉圭等強敵殺入決賽，而且狀態漸入佳境，上仗狂數巴拉圭六個一皮，冇士哥嘅美斯上演助攻「戴帽」，喺更關鍵時刻發威，先至突顯到佢嘅球王地位，睇嚟佢已經儲好晒力，準備捧走人生第一個國際大賽錦標。

智利今屆5戰取得4勝1和，但與阿根廷相比，所遇對手冇咁惡啃，當中3場更係以眾凌寡，包括8強干沙路查拉向卡雲尼「爆菊」，激嬲後者出手而被逐，晉級過程中唔多唔少因主場之利而受惠，未受考驗。而且干沙路查拉亦惡有惡報被罰停賽兩場，今仗唔使預佢，賽前仲爆出王牌阿歷斯山齊士仍未傷愈，就算紮住上都難望托弗，令前線拍檔伊度亞度華加斯孤掌難鳴，相反阿根廷只有中堅加雷因腸胃炎倦勤，影響不大。

捧盃即升世界第一
自1993年攞過南美國家盃（美洲盃前身）後，阿根廷已經22年未嘗於國際大賽封王，以美斯為首嘅「黃金一代」今仗渴望打破魔咒，而且只要今仗贏波，阿根廷便能壓過德國升上國際足協世界排名第一，為佢哋帶來額外動力。而一向被批評喺國際大賽冇貨交嘅美斯，當然極渴望藉捧美洲盃來印證其球王地位。加上阿根廷於1990年世盃決賽不敵西德後翌年後就喺智利舉行嘅南美國家盃奪標，依家同24年前嘅情況一樣，相信一個吉兆，1.54倍「奪冠」咪錯過。