聽日大部分球迷都會將注意力放晒喺美洲國家盃季軍戰，但阿King就對歐洲賽場情有獨鍾；挪超嘅薩普斯堡近排表現跌晒Watt，今仗就算有主場之利都難贏實力分子莫迪，客W有1.55倍值得捧場。（周六凌晨1時開賽）

薩普斯堡主場三連敗
薩普斯堡近況認真麻麻，近四場聯賽都未贏過，最近兩場勝仗都只係挪威盃擊敗低組別對手，球隊狀態真係唔多好。薩普斯堡今仗有後衞卡積迪貝治同施格路斯迪續因傷缺陣，中場艾斯卡亞要停賽，另兩位中場佐基姆湯馬臣同托斯達則上陣成疑，球隊實力大減下，有主場之利都未必惡得出樣。

莫迪上仗面對死對頭兼榜首球隊洛辛堡表現唔錯，最終成功以1比1逼和對手。雖然經過十四輪聯賽後，衞冕嘅莫迪已落後洛辛堡多達十一分，但班波似乎未有失去戰意，仍會繼續努力希望迎頭趕上。莫迪今仗同樣有主力停賽，包括隊長兼中堅維加特科倫及前鋒賀爾蘭特，而前鋒巴根加、古白蘭辛及中場麥尼施蒙臣續因傷缺陣，中場吉特則上陣成疑，但莫迪實力始終遠勝薩普斯堡，加上薩普斯堡主場已連輸三仗，相信今次都係凶多吉少，阿King當然撐莫迪贏波。

至於美職方面，侯斯頓戴拿模主場已連贏四仗，今仗面對近十場作客未贏過嘅芝加哥火燄，相信可以輕鬆贏波。另一仗西雅圖海灣者及華盛頓聯隊皆有多名主將唔踢得，但今場係華盛頓聯隊連續第四場嘅作客賽事，球隊舟車勞頓下相信難以踢出水準，今仗都係捧海灣者。