美洲國家盃季軍戰聽朝陪你食早餐，秘魯對巴拉圭一於玩1.62倍入球大！其他唔講，淨係近6屆季軍戰全部開入球大，大家就應該識揀啦，加上秘魯嘅荷西古里路同巴拉圭嘅巴里奧斯，同樣要入波爭金靴獎，我唔覺得兩隊會玩守囉！（now681台周六早上7:30直播）

對上6屆季軍戰全開大
通常大賽嘅季軍戰，都會比較多入波，因為大家都放低咗心理包袱，甚至會派啲副選球員出戰，後場好易出現漏洞，好似上屆秘魯喺季軍戰對委內瑞拉，就要贏夠4:1至收手。仲有呀，對上6屆季軍戰全部開入球大，如果秘魯同巴拉圭縮後打防守，睇怕會被入場球迷噓到暈，揀入球大冇錯。

辛達告魯斯缺陣

巴里奧斯擔正爭士哥
秘魯喺4強以1:2不敵東道主智利，表現已經有晒交代，但佢哋有中堅森拜奴食紅牌，今場要停賽，肯定會削弱球隊防守力量，加上射手荷西古里路喺上屆季軍戰有連中三元，最終以5球搶走金靴獎嘅經驗，唔通今場佢會手軟咩？梗係希望趁季軍戰，照辦煮碗入多幾球，做多次美洲盃神射手啦！

另一方面，巴拉圭喺4強以1:6慘負阿根廷，中場達里斯干沙利斯同隊長辛達告魯斯喺上半場連環受傷離隊，都算唔好彩。不過咁，辛達告魯斯唔踢得，代表前鋒巴里奧斯可以打正選，佢同荷西古里路一樣有3個入波，只差智利嘅伊度亞度華加斯1球，難得有得擔正爭做神射手，隨時行大運呀！