周中英超加開快車，講到今晚重頭戲，非曼聯作客紐卡素莫屬。紅魔主帥尹戈爾死性不改，其「催眠足球」悶到冇朋友，佢仲偷換概念大讚防線堅掂，而紅魔兩大食胡前鋒朗尼同安東尼馬迪爾，一個腳風唔順、一個傳出「偷食」醜聞，完全畀唔到人信心，連比較靠得住嘅「小豬」舒韋恩史迪加都傷埋，面對傷兵滿營，即使作客下游嘅「喜鵲」，隨時又係悶戰一場，細盤有買趁早。

(now 621周三凌晨3時45分直播)

方丈排陣亂點鴛鴦
曼聯主帥尹戈爾捱過早前8場不勝嘅困局，連贏兩仗總算度過信心危機，不過佢堅持控球唔冒險嘅「催眠足球」，真係令人瞌着，日前英足盃去到補時3分鐘先靠朗尼嘅12碼擊退甲組仔錫菲聯，攻力疲弱贏得堅肉酸，難怪名宿史高斯鬧爆紅魔好沉悶、無聊同消極啦。不過「方丈」死雞撐飯蓋，仲從另一角度大讚防守好出色，嘩！你贏嗰支只係甲組仔咋，咁都講得出堅唔知醜。

尹戈爾繼續重用嚴重跌Watt嘅朗尼，呢位隊長今季已多次證明逢出場猶如打少個，安東尼馬迪爾又畀「方丈」搞到唔知自己係中鋒定左翼，近日呢位「新亨利」仲被爆背住老婆偷食，靜靜雞空運索模去巴黎酒店爆房，受醜聞困擾下更難有好波。加上尹戈爾繼續亂點鴛鴦，唔用費蘭尼做高空轟炸，反而放「爆炸頭」喺中路派牌，「方丈」嘅奇招簡直拍得住「天才」莫耶斯。

喜鵲傷兵多焗死守
紐卡素方面亦唔好得幾多，唔計提早收咧嘅門將告魯爾，單睇有柏比斯施斯、安尼達、希達拉、路蘭度艾朗斯、奧巴坦、史提芬泰萊、米克威廉臣等嘅前中後傷兵名單水蛇春咁長，前鋒阿歷山大米祖域又敗家，中前場只得韋拿杜姆交到貨，黑仔主帥麥卡倫巧婦難為無米之炊，惟有先做好防守。雖然「喜鵲」連盃賽近4場輸晒，但場均只失1粒，包括造訪阿仙奴只係輸0比1，以曼聯單調到暈嘅進攻板斧，今仗又冇埋因傷倦勤嘅中場「小豬」舒韋恩史迪加，相信紐卡素防線應該頂得兩嘴，兩軍合演悶騷唔奇，入球細乃不二之選。