連續4場食白果！紐記死晒火
「冇精神、冇娛樂性、冇笑容」，正正係家陣曼聯嘅寫照，連球隊名宿史高斯都睇唔過眼，喪插佢哋大踢悶蛋足球悶親粉絲。紅魔變睡魔，一眾擁躉都好心酸，偏偏主帥尹戈爾繼續自我感覺良好，完全唔覺得有問題，今晚佢哋作客連輸4場、全面死火嘅紐卡素，仲點旨意兩隊有波入吖！1.68倍入球細睇怕都走唔甩。

曼聯畀人彈踢得悶，都已經唔係今時今日嘅事，最樣衰係佢哋上仗喺足總盃主場對住英甲仔錫菲聯，表現一樣冇驚喜。據統計，紅魔呢場頭45分鐘得3次攻門，而且全部唔中目標，仲要去到69分鐘先首次射門中框，有乜辦法唔悶親球迷吖。

史高斯插精神笑容娛樂性都冇
手擁朗尼、安東尼馬迪爾、桑馬達呢啲星級戰將，結果最後靠射入12碼先過到關，難怪激到史高斯賽後大鬧：「成班波冇晒精神，佢哋唔識互相鼓勵，冇晒笑容，連一啲娛樂性都冇！」

更激氣嘅係，尹戈爾賽後仲可以厚顏讚賞球隊防守出色，至於進攻就繼續打官腔，話會不斷改善喎。睇番紅魔已經連續5場比賽喺上半場食白果，完場計數亦只係入得4粒，真係信尹帥講會有改善至奇。況且，呢5場波除咗安東尼馬迪爾同朗尼之外，就再冇人識入波，紅魔想唔變睡魔都唔得啦。

對手紐卡素啞火問題更嚴重，佢哋已經食咗4場白果，兩大箭頭韋拿杜姆、阿歷山大米祖域齊齊唔見咗對射門鞋。講真吖，今季至係呢2位主力首次踢英超，踢完密集嘅聖誕快車賽程後，上仗足總盃又要作客出戰屈福特，呢鋪隨時回唔切氣腳仔軟。好在「喜鵲」最近防守未致於太差，連續4仗都只係僅輸0:1，今仗對住攻擊力同樣唔掂嘅曼聯，互交白卷都唔出奇囉！