今晚深夜有兩場西班牙盃16強次回合賽事，其中西維爾主場鬥貝迪斯一仗，西維爾首回合作客以2比0擊敗貝迪斯，今場主場出戰可以歎慢板，穩陣行先，留力踢周末西甲對馬拉加仲好，而狀態低迷、攻力弱雞兼啱啱炒教練嘅貝迪斯，亦無力反撲，阿King建議捧入球細。

（周三凌晨3時30分開賽）

近年嘅西維爾堪稱盃賽專家，除咗對上兩季贏得歐霸盃冠軍外，亦曾喺09-10球季贏得西班牙盃，梗係知道今場要點做先出到線喇！西班牙盃嘅賽制係計作客入球優惠，所以西維爾今場只要穩穩陣陣做好防守，保住不敗，就可以順利晉級。加上喺西甲排緊第6嘅西維爾要為前4而努力，佢哋3日後就要喺聯賽主場鬥馬拉加，今場當然要留力。

打比郡主場可添食
貝迪斯近5仗錄得4負1和，仲一球不入，而且剛剛炒咗主帥梅爾，軍心不穩下，對住近6主場皆零失球嘅西維爾想入波，甚至反勝出線？咪玩喇！兩軍近5次交手皆開細盤，一於再追！

周中英超英冠開快車，阿King特別揀咗兩場波，首先係布力般流浪主場對昆士柏流浪（ＱＰＲ），雙方均喺上年年尾委任新領隊，布力般搵嚟林拔領軍，ＱＰＲ則係車路士名宿哈索賓基，不過兩隊換帥後嘅成績依然冇改善，布力般近4仗錄得3負1和，場場都冇波入，哈索賓基更未錄得上任後首場勝仗，球隊攻力亦弱，今場捧入球細啱數。

（周三凌晨3時45分開賽）

最後一關係打比郡主場對雷丁，打比郡近8仗主場贏足7場，反觀雷丁聯賽作客6連敗，熱捧主勝！

（周三凌晨3時45分開賽）