今晚2支德甲球隊喺土耳其拍跳，由哈化柏林鬥漢諾威。雖然2隊喺積分榜一個天一個地，但同樣面對傷兵問題，呢次交手睇怕雙方都唔夠膽去盡，避免再有戰將受傷，1.88倍入球細抵玩。

（有線64及203周一晚11:30直播）

兩軍現傷兵潮無謂搏
哈化柏林今季演出令人驚喜，佢哋暫時落後拜仁同多蒙特排第3位，大有機會進軍來屆歐洲賽。現時隊波入面有前鋒艾拉基、後衞比卡歷等5件打柴，相信主帥戴達今仗都會叫班戰將錫身就住踢，避免喺無關痛癢賽事入面受傷，影響下半季部署。

至於排德甲17位嘅漢諾威，傷兵問題就更嚴重，包括中場清武弘嗣、門將拉特寧加等9件唔踢得，逼住積極增兵，一口氣掃入前鋒施沙拉爾、中場艾華科森、山口螢等4人。既然新兵咁多，佢哋點都要時間培養默契，霎時間好難擦出火花啫，入球細不妨一試喎。