今晚英格蘭足總盃第3圈，7屆盟主車路士主場迎戰英甲斯肯索普，「神奇領隊」希丁克臨危受命上「車」後已經撥亂反正，逐步引領車路士重返正軌，好多球員都獲得重生。呢位老帥上次中途接手半季，就帶領車仔於英足盃封王，希帥講到明教埋今季季尾就落「車」，而離任前好想贏錦標，眾車手都想報答佢老人家再造之恩，等佢可以光榮引退，今次出戰甲組仔又點會留手呢？就算讓兩球照捧2.15倍讓球主勝。

（周日晚10時開賽）

執番正爛攤子 季尾走人
依家教波唔一定要係戰術大師，最緊要係識做人同球員溝通，季初「寸王」莫連奴剛愎自用，搞到車仔上下雞犬不寧，任你叻到曉飛都冇用，冇球員肯為佢賣命終於被炒。希丁克中途接過呢個爛攤子，雖然好惡搞，但佢最擅長做「心理按摩」，理順內部各大小圈子，因車仔球員嘅問題唔係質素，而係暫時失去信心，激發球員重拾自信正係佢強項，好似季初失晒魂嘅伊雲洛域、奧斯卡杜斯山度士、迪亞高哥斯達等，喺希帥麾下逐漸上力，後兩者上仗大勝水晶宮3比0之役更各建一功，證明車仔已經撻番着副偈。

同大家回一回帶，希丁克09年頭喺車仔怒炒史高拉利後，當時教緊俄羅斯國家隊嘅希帥以兼職身份臨危受命，不但英超殺入前3同歐聯入4強，英足盃更攞埋冠軍，佢嘅事迹至今仍為人津津樂道。如今希丁克又照辦煮碗，並且個個都畀機會，雪到硬晒嘅防中約翰米基爾連場擔正，今仗就算法卡奧及夏薩特因傷上陣成疑，預計常任後備艾度巴巴及新仔羅夫度斯卓克都有機會正選。賽前希丁克宣布教埋今季鐵定唔會留任，仲話希望喺走之前幫車仔至少攞一項錦標。

甲組仔未夠班 等做炮灰
希帥深得眾將愛戴，佢哋肯定搏甩髀，喺英超無望歐聯太難嘅情況下，捧英足盃歡送佢老人家係最合理期望，今仗係第一擊更不容有失。斯肯索普只排英甲第15位，上圈都係靠重賽返主場先淘汰奧連特，中場麥舒菲爾仲養緊傷，作客史丹福橋好難唔做炮灰，況且車仔對上6屆英足盃第3圈全勝兼最少贏兩粒，故大炒可期，直取讓球主勝。