德甲仍處於歇冬期，不過佢哋並冇因此偷懶，唔少球隊相約踢熱身賽，力求催谷球員狀態。今晚史特加喺土耳其比歷克力氏球場，同德乙波琴拍跳，呢班波自從喺換帥後表現明顯有改善，今仗有力砌低對手，捧1.82倍主勝。

（有線61及201周日晚上11:35直播）

史特加喺上年11月辭退主帥索寧加，搵嚟青年軍教練卡藍尼做住看守教練，點知球隊亦喺佢帶領下近4場取得1勝3和，更於歇冬前以3:1打敗禾夫斯堡，走出降班區域，史特加亦好識做咁喺上年年尾同卡藍尼簽新約畀佢坐正。

家陣史特加隊內氣氛好轉，先有主力中場菲臘高斯迪治講明唔會離隊，中場羅比古斯、門將蘭格歷克有望今仗復出，再者史特加簽入翼鋒哥斯基奧斯，大大增強士氣。呢鋪佢哋對住走勢回落，近9場德乙僅1勝嘅波琴，相信都實食冇黐牙。