德甲正值歇冬期，列強絕大部分都選擇出外集訓，而且都相繼展開連串嘅熱身賽，以保持狀態迎戰下半季賽事。今晚到聽朝共有三場熱身賽有得直播，當中德甲史特加同德乙波琴喺土耳其比歷克拍跳，史特加近期不但動作多而且備戰工夫做得足，面對前線火力甚佳嘅波琴預期會係入球騷，1.59倍大盤係過關佳選。

（有線61及201台周日晚11時35分直播）

史特加上半季成績一直麻麻，球隊歇冬前忍唔住換帥，由青年軍教頭卡藍尼上任，果然可以團結球隊，佢哋已經連續4場正式賽事不敗，喺聯賽榜亦由包尾升番上尾4，暫時跳出降級區，球隊啱啱由加拉塔沙雷簽入前多蒙特嘅通天老倌哥斯基奧斯，仲喺3日前嘅熱身賽反勝土超球隊安塔利亞一役上陣，證明狀態唔曳上力甚速；波琴備戰工作同史特加幾乎同步，佢哋陣中擁有穆拉柏同泰路迪兩大射手，今場有能力攻破史特加唔算穩嘅防線，預期入波唔會少，入球大得1.59倍熱食無妨。

德甲雙雄征美齊攞威
除咗喺土耳其，美國嗰邊更熱鬧，兩支德甲勁旅利華古遜同史浩克04都去咗奧蘭多，參加一個名為佛羅里達盃嘅熱身賽，呢項賽事共有9支參賽隊伍，除咗兩支德甲球隊，歐洲代表仲有烏克蘭薩克達，另加來自巴甲嘅哥連泰斯、富明尼斯、明尼路同國際體育會，哥倫比亞嘅聖達菲同東道主北美超球隊勞德代爾堡前鋒。明早利華古遜對聖達菲（now 670周一早上6時直播）同勞德代爾前鋒對史浩克04（now 670周一早上8時30直播），兩支德甲球隊明顯技高一籌，齊捧讓球勝。