今晚繼續上演英足盃第3圈賽事，連續2屆盟主阿仙奴展開衞冕第一擊，主場鬥「黑貓」新特蘭。阿仙奴貴為英超榜首，聯賽爭霸之餘，英足盃亦力求3連冠；相反客軍喺英超排尾二，深受降班威脅，「兵工廠」戰意近況贏晒，強捧阿仙奴1.63倍讓球主勝！

（周六晚11時開賽）

阿仙奴今場繼續有「A山」阿歷斯山齊士缺陣，呢位猛將因為大腿傷勢已經缺席英超聖誕同新年快車，領隊雲格表示雖然A山已經好番好多，但就仲未夠狀態，為穩陣起見，今仗唔會派佢落場。其實「兵工廠」缺少A山期間仍然錄得6勝1負強勁走勢，包括12月份喺聯賽主場殺敗今場對手新特蘭3比1。

阿仙奴走勢咁弗全賴另一王牌奧斯爾，呢位中場大腦今季一共交出5個入球16次助攻，有佢效力呢兩年，「兵工廠」未曾輸過一場英足盃比賽，堪稱「盃賽福星」，加上其他隊友好似「銀河唯一」基奧特、禾確特等頻頻有斬獲，後面又有門神施治守住大門，防守更見穩健，所以阿仙奴以5.5倍成為英足盃捧盃次熱絕對有理！

新特蘭作客例腳軟
喺英超陷入降班漩渦嘅新特蘭，英足盃咁快抽中對阿仙奴可能係件好事，事關可以早啲出局專心護級！雖然「黑貓」對上一次喺英足盃遇上阿仙奴贏2比0晉級，但佢哋今季首要目標肯定係留喺英超，爭盃都屬其次，今場冇謂做攔路虎。論近況「黑貓」近8作客輸足7場，其中最近3場客戰輸波都至少輸兩粒，場場起碼失3至4球，防守曳成咁，爆冷機會微乎其微，阿仙奴1.63倍讓球主勝真係咪走寶。