「地上最強」巴塞隆拿上仗聯賽喺打吡戰畀愛斯賓奴逼和0比0，痛失兩分之餘仲畀同晚贏波嘅馬德里體育會取代榜首位置。巴塞為求重奪「一哥」位，今晚喺主場迎戰排第17位、今季作客只係贏過兩場嘅CF格蘭納達，相信會全力進攻務求大勝對手，讓球主客和巴塞就算讓到三球都冇有怕，阿謙捧1.83倍讓球主勝。

（now 632周六晚11時直播）

巴塞上仗聯賽同愛斯賓奴進行打吡戰，結果喺對手嚴密防守下只能踢成0比0痛失兩分，更嚴重嘅係馬體會贏波後以兩分之差力壓巴塞上榜首，令「地上最強」只能做「阿二」。谷埋成肚氣嘅巴塞球員，喺周中西班牙盃16強首回合主場再鬥愛斯賓奴時以4比1大炒對手，當中美斯更梅開二度表現出色。

蘇亞雷斯西盃停賽兩場
巴塞今仗繼續喺主場出擊，為咗重奪榜首位置，相信都會派出「MSN」組合美斯、蘇亞雷斯同尼馬上陣，其中蘇亞雷斯由於喺西盃同對手喺球員通道發生衝突被秋後算帳，要喺西盃停兩場，可全力喺聯賽搏殺，今仗要撕破CF格蘭納達嘅防線絕非難事。

CF格蘭納達上仗聯賽主場擊敗西維爾表現唔錯，球隊周中喺西班牙盃16強首回合面對華倫西亞時雖然輸0比4，但佢哋收起咗部分主力球員，所以大敗不足為據。不過，CF格蘭納達過去作客魯營球場嘅表現認真麻麻，近兩次造訪輸晒之餘仲畀巴塞入咗10球，今仗面對要積極搶攻嘅「地上最強」相信都係等做「炮灰」，阿謙相信巴塞可以喺主場大勝一仗重返榜首，讓球主客和雖然要讓到三球咁多，但讓球主勝仍然值得支持。