墨超秋開鑼戰好路
墨超秋季聯賽明早開鑼，揭幕戰克雷塔羅主場對阿特拿斯，無獨有偶，雙方上季都係首輪交鋒，當時克雷塔羅作客贈對手兩蛋，今仗喺自己地頭出擊，勝算更加高。事實上，阿特拿斯過去6次作客克雷塔羅，輸咗5場，睇怕都係無力發圍，克雷塔羅主Ｗ1.83倍抵玩。

（周六早上9時30分開賽、馬會網上文字直播）

阿特拿斯近5交手輸4次
克雷塔羅曾於14年簽入朗拿甸奴，令球會聲名大噪，雖然細哨已離隊，但仍然有阿根廷射手艾曼紐韋拿助陣，佢上季以借用身份加盟，為球隊轟入13球，榮膺聯賽神射手。呢位33歲老將今季正式被克雷塔羅買斷，可以專心搏殺，更值得期待。

阿特拿斯近年一直被克雷塔羅食住，雙方近5次交手，阿特拿斯輸咗4次，過去4次作客克雷塔羅，唔止未贏過，更連1球都入唔到。阿特拿斯新一季並冇大事增兵，恐怕難以打破宿命。

另一場墨超迪祖亞拿主場對帕丘卡，兩隊慣咗不設防，迪軍上季17場聯賽只有2場不失，帕丘卡則屬於失波最多嘅球隊，最好揀入球大。