今晚英甲上演獨腳戲，由韋根主場對基寧咸。韋根自從12/13年球季喺英超降班後，上季再降一級跌落英甲比賽。班波今季總算回勇，暫時排喺第5位，仲可以爭取升班機會。不過呢鋪對住同樣為升班席位搏命嘅「阿二」基寧咸，加上球隊剋星戴克腳風勁順，怕且今仗失分極高，寧捧1.85倍「讓客」。

（TVB301台周五凌晨3:45直播）

韋根多年嚟有驚無險咁留喺英超打滾，直至3年前先失手降班。點知班波一衰再衰，今年再跌至英甲比賽。雖然今季冇再沉淪，但近期表現反覆，近3鋪主場出擊全部贏唔到，今仗未必可以咁易贏波反底喎。

戴克腳風順專剋韋根
再講吖，韋根喺首循環賽事，就係被基寧咸中場戴克梅開二度所殺敗，呢位中場可謂韋根剋星，偏偏佢近嚟腳風超順，近4仗攻入3球。至於另一鋒將多明尼森姆同樣狀態大勇，喺聖誕快車期間射入3球，呢對「士哥拿」今仗誓成韋根後防心腹大患。

咪以為基寧咸只得佢兩個人Fit到漏，實情成班波都勇不可擋。基寧咸最近連贏4場，當中3仗均3度攻破對方大門，最重要係防線4戰夾埋只係失守1次，名副其實係攻守兼備。家陣個勢咁好，造訪韋根搶晒3分落袋唔過分啫。