兩連勝迎擊作客蟲
今晚有3場波，阿King一於整條3串1齊齊收錢。西班牙盃16強首回合，伊巴會喺主場迎戰拉斯彭馬斯，伊巴近期表現惹人好感，球隊主場表現唔差，聯賽兩連勝仲一球不失。對手拉斯彭馬斯今季作客未贏過，加上身處聯賽榜下游，相信都係專心踢好聯賽先，伊巴今仗小讓平半，阿King撐上盤。

（周五凌晨3時30分開賽）

伊巴近期嘅表現實在唔差，尤其上仗作客貝迪斯大炒對手4比0，上下半場各入兩粒表現充滿說服力。伊巴今季主場賽事表現亦唔曳，只係輸過畀「馬德里雙雄」皇家馬德里同馬德里體育會，而且贏波率唔低，今仗喺主場面對下游球隊拉斯彭馬斯，阿King相信佢哋有力再贏。

拉斯彭馬斯近兩場表現其實都唔差，上仗更打和前列球隊畢爾包，可惜球隊今季作客表現唔掂，喺仲未贏過嘅情況下，現排喺聯賽第16位，開始陷入降班漩渦。拉斯彭馬斯今仗雖有中場洛基美沙坐完波監復出，但仍有後衞艾卡拉斯、比加斯、安祖盧比斯同埋中場查維卡斯迪蘭奴因傷唔出得，加上現階段應會專心應付聯賽，相信今仗唔會全力以赴，一於捧伊巴上盤。

切爾達大恰細冇難度
另一場西盃，丙組嘅卡迪斯主場越級挑戰甲組切爾達。卡迪斯陣中最出名嘅係踢過世界盃嘅前西班牙國腳古爾沙，可惜佢已經35歲，要喺西甲分子身上入波有難度。卡迪斯上圈能夠晉級，全賴對手皇馬派錯違規球員被判出局，純屬夠運，切爾達實力始終贏晒，「大恰細」下有力先拔頭籌，簡單要客勝。（周五凌晨3時30分開賽）最後英甲韋根會喺主場對基寧咸，兩隊排名接近而攻力同樣唔錯，今仗隨時上演入球騷，一於捧大盤。

（TVB 301周五凌晨3時45分直播）