天空之城變地上最強
史篤城過去被球迷笑係「天空之城」，因為球隊崇尚傳統英式高Q大棍踢法，但自從佢哋喺上季搵嚟曉士執教後，開始走技術流路線。史篤城今季引入梳頓沙基利，聯同鋒將保贊同阿拿奧杜域組成嘅三叉戟組合，更係威力十足，地面組織流暢程度媲美一流強隊。呢次佢哋喺英聯盃4強首回合，主場面對火力極弱嘅利物浦，竟然有得受讓平半，咁抵玩1.8倍下盤咪走寶。

（TVB302周三凌晨4:00直播）

今季史篤城以保贊、阿拿奧杜域同梳頓沙基利做重心，呢支三叉戟唔止睇得，仲非常打得，完全將曉士推崇嘅地面推進踢法發揮得淋漓盡致。佢哋喺最近兩個月，分別喺主場殺敗車路士、曼城同曼聯3支豪門，踢到巴塞咁款，搓到對手陀陀擰之餘，3仗竟然一球不失，可見由查理阿當為首的防線，令前線可以更放心進攻。

阿拿奧杜域專o趙強隊
史篤城三叉戟當中，有「奧地利伊巴」之稱嘅阿拿奧杜域至架勢，喺呢3場比賽均有士哥，堪稱強隊殺手。加上佢哋近5仗主場出擊贏4次嘅氣勢，呢鋪就算中場謝夫甘馬倫停賽，面對利物浦至少能夠保住不敗。

利物浦同主帥高普蜜月期已過，演出明顯下滑。紅軍依家最大問題係火力不足，單計聖誕快車賽程，成隊波竟然只係得賓迪基1個入到波，已經睇到人皺晒眉。若然睇埋佢哋客途作戰就更加曳，近5場作客只係贏得1場，夾埋入得1粒，堅難捧得落手囉。

紅軍聖誕快車得賓迪基有波入
領隊高普對上仗作客0:2敗走韋斯咸非常勞氣，認為部分球員未盡全力。偏偏前鋒史杜列治、奧歷治、中場佐敦軒達臣今仗仲要繼續養傷，就算高普想換人變陣都冇合適人選，怕且佢哋都幾難突然提升攻鋒力咯，呢鋪仲學人讓波？咪玩啦。