唔少球星「踢而優則教」，憑住過去亮麗功績，令佢哋有更多執教頂級聯賽球隊機會，若然識埋個班主老友，就算極速上位都唔出奇。好似曼聯名宿加利尼維利，上個月就意外接掌華倫西亞帥印，不過踢得叻唔代表實教得好，呢鋪「蝙蝠軍團」作客維拉利爾即使受讓半一，都係揀2倍上盤穩陣。

（now632台周四晚11:00直播）

加利佬仲摸索緊華倫
加利佬喺球員時代獲獎無數，但講到執教經驗，佢只係做過英格蘭國家隊助教，點解佢可以空降華倫西亞？原來佢同「蝙蝠」班主林榮福勁老友，佢哋唔止一齊投資餐飲業，上年林生仲入主加利佬同傑斯等「曼聯92一代」擁有嘅足球隊沙福特城添，今次任命似乎係人情大於執教功力喎。

睇番加利佬自上任後，華倫先喺歐聯輸畀里昂出局，2場聯賽打和伊巴同基達菲，唯一勝仗僅贏低聯賽組別球隊巴拉卡度，證明佢仲摸索緊隊波，確實不宜沾手。主場嘅維拉利爾近5仗不敗入10粒，亦曾經喺聯賽贏過皇馬。更何況巴卡保、丹尼斯蘇亞雷斯等攻擊手狀態唔錯，對住有主力守將梅斯達菲、荷西加耶打柴嘅「蝙蝠軍團」，讓半一上盤抵博。