紅軍飄忽黑貓有雞偷

慘吞屈福特3蛋之後，利物浦喺Boxing Day對住榜首嘅李斯特城即刻反彈贏1比0，如果你覺得紅軍今場作客4連敗嘅「黑貓」新特蘭可以輕鬆贏波，咁「認真為輸了」！事關紅軍搵嚟名帥高普執教後，至今仍未脫海鮮味，遇強愈強，遇弱愈弱，今場作客讓「黑貓」半一咁多，博新特蘭下盤喇！

（now 621周四凌晨3時45分直播）

其實科娜講利物浦嘅問題真係講到有啲厭，但奈何紅軍仍未搵到解決方法：面對主攻嘅強隊，紅軍打防反，加上被外界睇死，球員特別落力，結果可以擊敗車路士3比1、曼城4比1；對住主守嘅弱隊，利物浦欠缺突破能力強嘅攻擊球員，加上球員身材偏矮又唔夠硬淨，破唔到密集攻唔入，結果被人打防反成功，例子有不敵紐卡素0比2、屈福特0比3。今場對住有擅長踢穩守突擊嘅艾拿戴斯領軍、球員平均身高更達182.8cm嘅新特蘭，想紅軍贏波，難啲囉！

波連尼倒戈要爭氣
「黑貓」近4場全敗，急需搶3分止血，好彩今場有大舊防中魯迪維爾刑滿復出，而倒戈嘅中堅高亞迪斯同前鋒波連尼更要大打爭氣波。其中「波仔」賽前仲表明︰「我比任何人都想入利物浦波！」戰意咁鮮明，「黑貓」隨時靠佢反底成功，捧下盤！