新特蘭「讓主」有「利」可圖
聖誕快車賽期密集，各隊領隊都為咗攞到理想分數絞盡腦汁，其中新特蘭領隊艾拿戴斯就去得最盡。佢喺上仗作客慘敗曼城1:4一戰中，不惜派出半隊後備迎戰，擺明留力今晚主場鬥利物浦，2.23倍讓主值得一試。
（now621周四凌晨3:45直播）
紅軍近5戰僅1勝
「黑貓」上仗一口氣派出前鋒丹尼格拉咸、中場祖迪高美斯、門將文路尼等5件後備兵上陣對曼城，明顯見到球隊決定集中精力喺今仗搶分。何況自從艾帥上任後，新特蘭主場戰績好轉，取得2勝2負，而且只係失咗2球，證明佢哋喺光明球場的確會踢高一班。再講吖，對手利物浦狀態麻麻，近5戰僅1勝，當中仲有3仗食白果添。加上主帥高普過去從未有過應付聖誕快車經驗，「黑貓」呢鋪想偷雞唔係冇可能囉。
