今晚英冠快車早場有榜尾嘅保頓喺主場迎戰布力般流浪，保頓呢排頻頻見報，先有財困問題盛傳會執笠，跟住就有領隊連儂涉嫌偷食同用刀威嚇情婦，雖然連儂得以保住帥位，但球隊受到眾多負面消息影響，表現繼續係零起色，喺Boxing Day對住護級對手洛達咸更遭大炒4蛋，布力般今場唔係贏唔到保頓呀？一於捧客勝！

（TVB 301周一晚8時45分直播）

除咗財困同領隊發生醜聞外，保頓最近亦因違反財政公平條例，被罰今季餘下日子冇得從事任何轉會買賣，真係印證咗咩叫「人衰行路打倒褪」。保頓踢咗23場聯賽僅得14分，距離護級安全線差7分，保頓處於頹勢又遇着快車，球員冇態冇士氣冇體力，點同布力般流浪鬥？流浪因禍得福，Boxing Day鬥米杜士堡一戰因大雨球場水浸延期，變相令球員體力得以保存，今場可以開行油「追殺」保頓呀！

米堡蓄銳(口趙)錫周三
至於踢少咗場搞到被搶去榜首位置嘅米杜士堡，今晚就喺主場對錫周三，米堡狀態大勇，防守又強，近4仗都能保持清白，加埋今場體力佔優，主勝咪錯過！

（TVB 301周二凌晨1時15分直播）

最後講埋另一場直播賽事，雷丁主場鬥賓福特，雷丁有中場謝希保拿、佐敦奧比達及守將安頓費迪南因傷休戰，加上球隊狀態麻麻，讓唔起近6仗作客僅1敗嘅賓福特，捧讓球客勝喇！

（TVB 301周一晚11時直播）