熱刺前晚主場以3比0輕取諾域治，目前喺英超積分榜排第4，只落後榜首嘅李斯特城6分，難怪唔少熱刺球迷喺Twitter留言，指球隊今季有能力贏得英超冠軍。熱刺今晚作客鬥屈福特，兩軍近期嘅攻擊力都唔曳，今仗交手入波應該唔會少，阿謙推介大盤。
（now 621周一晚11時直播）
熱刺喺「拆禮物日」主場面對諾域治，憑住前鋒哈利卡尼梅開二度，加上中場湯卡路爾錦上添花，以3比0輕取對手取得兩連勝。贏波後嘅熱刺以18戰32分排第4，落後榜首嘅李斯特城6分、次席嘅阿仙奴4分同埋排第3嘅曼城3分，如果前領嘅球隊喺餘下賽事稍有差池，熱刺隨時有機會升上榜首。以熱刺目前形勢，難怪唔少球迷都覺得球隊要贏英超冠軍並非天方夜譚，大批支持者喺Twitter留言指熱刺可以成為今季英超冠軍嘅競爭者之一，更有球迷認為球隊可以繼1961年後再度贏得英格蘭頂級聯賽冠軍。
屈福特主場鬥攻
至於熱刺今晚作客對啱啱打和車路士2比2嘅屈福特，後者近5仗錄得4勝1和，球隊只有後衞普特爾同艾史特蘭打柴，射手恩哈路連續5場有波入狀態甚弗。不過，熱刺近兩仗贏晒兼冇失波，前鋒哈利卡尼連續兩場有「士哥」，阿謙估計今仗隨時上演入球騷，大盤有1.95倍值博。
