拆禮物日另一焦點係重返史丹福橋嘅希丁克正式領軍第一擊，不過對手屈福特聯賽4連勝一樣咁弗，射手恩哈路腳風之順拍得住李斯特城射手占美華迪，呢場捧大盤最穩陣。

（now 623周六晚11時直播）

希丁克上次季中接掌車仔帥印係08/09球季，當時除咗助球隊贏得英足盃冠軍，季尾領軍嘅13場聯賽仲攞到11勝1和1負，戰績驕人。姑勿論球隊上半季成績係咪同前任領隊莫連奴有關，但事實擺在眼前，莫連奴被炒後上仗贏新特蘭，成隊波確係生猛番晒，連早前被指「詐傷」嘅夏薩特今仗都有機會復出，主場誓必搶攻求3分。

屈福特4連勝勢鬥攻
屈福特近況亦唔嘢少，上輪主場大炒利物浦3蛋，聯賽累積4連勝，射手恩哈路近4場入5球，加上好拍檔迪尼今季交出5入波4助攻，呢對攻擊組合威力實不遜當紅嘅華迪同馬列斯，有本錢同車仔鬥攻，捧大啱數。