澳職今日有兩場直播賽事，當中阿德萊德聯主場對威靈頓鳳凰有好介紹。鳳凰近5仗作客不勝，相反「阿聯」主場已兩連勝，加上近年主場對鳳凰佔盡上風，主Ｗ不容錯過。

（有線64及203台周六下午2時15分直播）

「阿聯」近期表現持續有改善，連續3仗不敗之餘，主場更兩連勝，明顯上晒力，中場指揮官卡路斯卡重拾勇態，加上守將拿洛卡及前鋒伊利巴巴積今仗應可復出，球隊現時氣勢如虹，有望贏波再力爭上游。

鳳凰上仗主場1比1逼和FC悉尼，令人失望，呢隊波向來主強客弱，今季聯賽客戰贏得1場，近5場作客更未嘗勝果，實在不宜高估。鳳凰今仗防線唔齊腳，薛蒙特因傷缺陣，另一後衞湯杜爾則要停賽，加上球隊近6次作客「阿聯」輸足5場，今仗都係凶多吉少，阿謙撐主勝。

悉尼遇弱冇留「手」
另一場直播賽事係FC悉尼主場對中岸水手，FC悉尼靠防守起家，11戰只失9球屬全澳職最穩，前鋒保斯基嘅腿筋傷已經好得七七八八，今仗有望復出，相信攻力會有所加強。對手水手今季曳到爆，只係贏過1場而失咗24球，係澳職防守最差嘅球隊，難怪排緊包尾。水手近5仗作客輸足4場，今場仲有中場格連迪菲路同後衞積基艾迪臣唔踢得，點講都捧唔落手，進取啲可捧讓球主勝。

（有線64及203台周六下午4時30分直播）