年尾收爐搶得就搶
「兵工廠」聖誕新年衝衝衝，矢志重奪失落12年嘅英超錦標！阿仙奴進入傳統年尾「粉飾櫥窗」爆發期，連歐聯賽事在內12月4戰全勝。加上兵工廠近4季Boxing Day同年末聯賽嘅賽事，錄得7戰6勝靚績，今晚英超尾場作客修咸頓，全取3分在望，力撐阿仙奴1.93倍客W。

（now 621周日凌晨3時45分直播）

阿仙奴現時落後榜首李斯特城2分，但就成為1.9倍英超冠軍大熱，莊家明顯睇好兵工廠可以後來居上。事實上年尾一向係阿仙奴搶分高峰期，由Boxing Day開始，除咗12/13球季因為地鐵罷工打少1場，過去4季年尾嘅最後2場聯賽，總共7戰取得6勝1和，往績有晒保證。

阿仙奴現時走勢凌厲，歐聯絕地反擊成功出線，英超亦連贏3場，包括上仗2比1擊敗勁旅曼城，一班球星狀態弗到震，「銀河唯一」基奧特近4仗喪轟6球，奧斯爾已累積15次助攻，加埋快翼禾確特傷愈後都有士哥，就算「A山」阿歷斯山齊士繼續養傷，呢個進攻鐵三角都足以反轉修咸頓防線。

修咸頓內外受壓衰到震
修咸頓連盃賽近6戰1和5負，衰到貼地，領隊朗奴高文開始聞到「魷魚香」，陣中部分主力下月更可能離隊，中場雲耶馬成為唔少豪門爭奪目標。球隊依家面對內憂外患，有地利都抵擋唔住來勢洶洶嘅阿仙奴，客Ｗ咪錯過。