冇理由打和益狐狸
隨住李斯特城前日作客3:2打敗愛華頓，代表阿仙奴同曼城想以英超一哥身份過聖誕無望。做唔成「聖誕冠軍」，但係兵工廠今晚主場鬥「藍月亮」，雙方都想攞番個亞軍補數，兼為嚟緊嘅「聖誕快車」賽期打強心針，何況雙方今場打和咪盞益咗「狐狸」，仲邊肯留手先？1.72倍入球大值得捧場。

（now621台周二凌晨4:00直播）

阿仙奴踏入12月後全面回勇連勝3場，當中喺歐聯分組賽最後一輪賽事更上演絕地反擊戰，作客大數奧林比亞高斯3:0昂然晉級。射手基奧特擺脫敗家仔形象，連續3場士哥合共轟入5球，真係勒都勒唔住，呢鋪對住連續7仗失守嘅曼城，隨時又再一次騷哥利。

基奧特決戰阿古路
講Fit嘅又點只「銀河唯一」1個先，阿仙奴中場大腦奧斯爾同樣咁堅。呢位德國中場今季源源不絕為球隊提供彈藥，齋計英超賽場已經交咗2個入球、13次助攻，驚佢一個雙拳難敵四手？唔怕，隊友艾朗藍斯自從重返中場中位置後，隨後3戰亦交出2入球2助攻，完全有力分擔「兵工廠」進攻重責。之不過防中高基連打柴，由活力大不如前嘅法米尼頂替，隨時令防線直接受壓出錯。

咪忘記對手曼城今仗有射手阿古路復出，呢位阿根廷國腳盤射俱佳，係少數具備以一人之力摧毀對方防線嘅頂級鋒將。加上中場大衞施華、耶耶托尼愈踢愈好，「藍月亮」呢勻的確夠條件同兵工廠駁火。

曼城冇高柏尼例失波
曼城最弊係中路守將高柏尼繼續養傷，佢哋今季缺少呢位鐵衞下，15次出擊竟然未試過保持到清白身！計落球隊對上7仗，無論喺英聯盃對住英冠侯城，定還是聯賽迎戰護緊級嘅史雲斯，通通被對手攻破大門，證明防線冇咗高柏尼堅唔掂。既然雙方今仗人腳同樣攻優於守，今晚交鋒仲邊使驚有冷場吖！博大啦！