又到聖誕，又到聖誕，德乙同荷乙踢埋今輪賽事歇冬，球員可以慶祝聖誕節嘞！其中德乙有場海軍鬥水兵，第16位嘅柏達邦主場對第15位嘅杜塞爾多夫，柏達邦球員有冇holiday mood就唔知，不過頹mood就肯定有，柏軍近4戰輸足3場，其中上場更被大炒4蛋，杜塞爾多夫有得受讓唔好錯過，捧讓球客勝！
（周二凌晨3時開賽）
柏達邦今季由德甲降落德乙，點知依家又有降班危機，開季頭10場錄得2勝1和7負劣績，終於喺今年10月易帥，搵嚟零執教經驗嘅拜仁慕尼黑名宿艾芬保執教鞭。呢位47歲前德國國腳的確有個好開始，領軍頭兩場聯賽全勝，不過好快就打回原形，最近6場聯賽未贏過，對上4場更場場失兩球或以上，脆弱防線成為球隊致命傷。
今場對杜塞爾多夫嘅護級戰，艾芬保更面對用人煩惱，中場主力施利文高坐波監，另外兩名中場基斯甸碧高同胡仙洛域又因傷缺陣，前鋒馬希亞沙歷同中場布克拿狀態唔掂又被棄用。杜塞爾多夫近況冇柏達邦咁差，上場作客FSV法蘭克福更贏波而回，取得今季首場客場勝仗，士氣點都好啲，今場受讓值得捧場。
布拉加遇費利拿旺大
荷乙方面，禾寧丹作客阿積士青年隊，雙方交手旺開大盤，近4次對戰有3場總入球達到5球或以上，而阿積士青年隊近期又防線大穿窿，近5仗有4仗至少失3球，今場入球大細中位數開到3/3.5球，照捧入球大呀！最後講埋葡超嘅布拉加主場迎戰費利拿，費利拿前鋒般奴摩利拉腳風極順，近3仗入4球，加上近3次鬥布拉加均開大盤，一於再追大盤。
