雖然意甲波蠱惑多，但今晚「一哥」國際米蘭主場對沉到爆嘅拉素，肥叔認為正路到暈，今季重拾佳態嘅國米，初盤要讓半一，而且拉素不斷回飛，「藍鷹」被睇淡，肥叔力撐國米上盤。

（TVB 301周一凌晨3時45分直播）

上周大戶認真叻豬，扑中英超利物浦對西布朗嘅大盤之餘，意甲AC米蘭對維羅納亦喺AC被追和1比1兼打少個下，當機立斷買入球細，最終維持1比1賽果順利收錢。相反散戶就太過心急，上周中世冠盃4強巴塞對FC廣州，由於美斯臨時因病缺陣，賽前出現回飛迹象，巴塞從讓2.5/3球，跌到落賽前嘅讓2.5球，散戶見到美斯No Show慌死蝕底，急急入定FC廣州下盤，可惜一個蘇亞雷斯就連開3槍，啱啱好開出上盤，賽前回飛只係技術性調整，所以凡事都係要睇定啲先好。

拉素作客4連敗
今日重心推介係意甲「一哥」國際米蘭主場對拉素，兩軍今季各走極端，國米近7仗聯賽贏6場，順風順水，相反拉素近7仗聯賽未贏過，單計作客更加係4連敗，況且開盤後係咁回飛，由初頭嘅八水升到上去八七水，隨時仲有得升，咁樣吹淡風實在捧唔落手，肥叔建議捧番今季幾正氣嘅國米上盤。

另一場較早時間開波嘅意甲，尾五嘅森多利亞主場對「傻豹」巴勒莫，森多換咗「飛機仔」蒙迪拿擔任主帥後，連盃賽5戰不勝兼輸咗4場，曳到冇朋友，「傻豹」上仗擊敗費辛隆尼反彈，開平手盤比較合理，但初盤森多仍要讓平半，而且只得八六水，比「傻豹」更低，已經顯露玄機，睇嚟莊家收到風，肥叔一向睇盤做人，一於捧番森多上盤。

（周一凌晨1時開賽）