意甲今晚有大戰上演，「一哥」國際米蘭主場迎戰拉素，今季翻生嘅國米近況大勇，近8場比賽贏咗7場，莫路伊卡迪、祖維迪等主力踢到上晒身，相反作客嘅拉素近7仗聯賽只拎得2分，兩隊狀態同實力都有距離，國際米蘭有力開出主勝。

（TVB301周一凌晨3:45直播）

國際米蘭今季重振雄風，而且唔使分心歐洲賽事，喺聯賽愈踢愈有，依家16場聯賽贏咗11場，而且贏得愈嚟愈有說服力，近5場比賽有3場贏3球或以上，莫路伊卡迪同祖維迪重拾水準，前者在上仗聯賽梅開二度，後者亦克服傷患結束入球荒，令國米如虎添翼。

拉素倒退作客唔掂
拉素上季雖然係意甲季軍，但今季表現大倒退，近7仗只得2和5負，依家已經跌到聯賽榜下半區，德國老將射手高路斯今季仍未入過波，表現令人擔心。拉素聯賽作客成績亦差，7場輸咗6場，今次到訪聖西路球場想有分都幾難。