世界冠軍球會盃今晚於日本橫濱上演王者戰，由南美洲冠軍河床和歐洲冠軍巴塞隆拿爭逐錦標。歐洲代表近8屆冠軍贏咗7屆，不過只有2次可以喺決賽淨勝對手3球或以上，就算巴塞兩大王牌美斯、尼馬今仗有機會復出，但讓球主客和讓到兩球實在太多，河床攻力一般但勝在防守唔曳，巴塞首要任務只求捧盃，冇大數對手嘅必要，更何況中位數調高至3.5球，一於敲入球細。
（有線61、64、201及203台周日晚6時30分直播）
美斯尼馬未必正選
世冠盃創辦以來11屆冠軍唔係歐洲隊就係南美洲隊，今屆決賽再由呢兩大代表角逐可以講係預期之內。頭3屆世冠盃係南美球隊天下，但由2007年開始，過去8屆冠軍歐洲隊贏咗7屆，成績後來居上，從今場巴塞客W熱至1.05倍、讓球主客和要讓二球，反映外界都一面倒睇好「地上最強」。
巴塞賽前收到好消息，上仗據報因生腎石絞痛而缺陣嘅美斯已無大礙，早前受傷嘅尼馬亦有參與操練，兩人都可望復出，不過一眾小將包括蒙尼亞艾哈達迪、沙治羅拔圖今季已經可以擔大旗，加上蘇亞雷斯狀態又咁弗，美斯、尼馬未必會正選登場。睇番歐洲隊過去7次捧盃，只有2010年嘅國際米蘭及2011年嘅巴塞可以喺決賽淨勝3球或以上，對上兩屆嘅拜仁同皇馬同樣都係小勝2比0，車路士仲喺2012年輸埋畀哥連泰斯，反映決賽過程唔係想像中咁一面倒，盤口上今仗捧巴塞並冇着數。
河床穩守唔會多失
事實上，大部分歐洲代表上半季都要兼顧本土聯賽、盃賽在歐聯分組賽，臨近歇冬難免有疲態，相反河床自從11月尾踢完南球盃4強次回合，直至上場準決賽對廣島三箭，已有大半個月冇正式比賽，可以養精蓄銳。話分兩頭，河床咁耐冇比賽，講狀態可能及唔上巴塞，但佢哋勝在有自知之明，上場對住牌面較弱嘅廣島三箭亦冇胡亂搶攻，尤其後防面對三箭嘅多次反擊都冇鬆懈，集中力值得一讚，相信今場面對火力強勁嘅巴塞更會打醒十二分精神。考慮到河床守強於攻，今仗想入巴塞波亦唔容易，中位數調高至3.5球，建議捧細。
