今晚西甲皇家馬德里主場迎戰尾三嘅華歷簡奴，「銀河艦隊」上輪意外輸波，隨住巴塞要遠征日本出戰世冠盃，必定把握搶分機會，而且皇馬仲會為一名黎巴嫩難民兒童到場睇波圓夢，好心有好報，撞正唔識防守嘅華歷簡奴大炒可期，就算要讓三球，斯維照撐皇馬讓球主勝。

（now 632周日晚11時直播）

皇馬上仗作客0比1意外不敵維拉利爾，未能把握「一哥」巴塞主場賽和拉科魯尼亞2比2嘅失分機會，反被對方拋甩至5分差距，加上之前西班牙盃因派違規球員上陣被判出局堅醜怪，趁住依家巴塞遠赴日本出戰世冠盃，教練賓尼迪斯為保帥位，必下格殺令追擊華歷簡奴。

黎巴嫩遺孤 睇C朗圓夢
除此之外，皇馬亦大玩「公關工程」，早前講過一位叫希達嘅3歲黎巴嫩難民，因一次自殺式炸彈襲擊失去雙親，呢位孤兒原來係皇馬王牌C朗粉絲，「銀河艦隊」收到風後，唔單止邀請希達同C朗見面及參觀巴拿貝球場，今仗更會請希達入場成為座上客，等佢可以現場欣賞偶像C朗表演。

華歷簡奴現時排喺西甲尾三，但喺教練占美斯領導下，依然貫徹主動進取嘅打法，呢種「有前冇後」打法睇就好睇，但對住勁旅相當蝕章，今季試過造訪巴塞領先下反輸2比5，非常轟烈，近4仗聯賽錄得1和3負，近5仗西甲作客更未曾1勝，仲要唔識防守，去到巴拿貝球場盞衰多兩錢重。皇馬近態雖然反覆，但近6仗主場賽事5勝共轟入19球，加上近4次主場對華歷簡奴，有3次贏4粒或以上，明顯食住對方，今仗勢必大炒一場吐烏氣，讓球主客和要讓三球都冇有怕，照揀讓球主勝。