欢迎来到足球图库!
当前位置:主页 > 香港商报 >
曼聯兵作反撐唔諾手
时间:2015-12-19 06:32   来源:足球图库

球員更衣室鬧爆主帥
對住隊般尼茅夫都輸得,歐聯又出埋局,曼聯家陣唔淨止陷入低潮,英媒仲傳佢哋爆發兵變,今晚「紅魔鬼」喺主場恭候諾域治勁多隱憂,就算有隊長朗尼復出都唔太信得過。「金絲雀」呢期表現對辦咗好多,受讓一球捧2.15倍下盤。(now621台周六晚11:00直播)

車路士今季衰到貼地,領隊莫連奴就算多球迷撐,最後都要落鑊。曼聯排前列睇落風光過車路士好多,實情佢哋近況直插谷底,歐聯分組賽出局之餘,最近3場聯賽亦都全部失分,當中以上仗作客輸畀般尼茅夫最羞家。幾份英國報章都爆料,話有「大佬級」球星喺更衣室開主帥尹戈爾波,鬧爆佢啲戰術同用人唔掂。

61%魔粉想炒尹戈爾
「紅魔」網站United We Stand賽前做咗個民意調查,足足有61%球迷認為尹戈爾應該要被炒,證明球迷對尹帥幾咁不滿。雖然《曼徹斯特晚報》話,隊長朗尼已經克服足踝傷患,今晚可以復出,但係「魔童」今季狀態係點大家有眼睇,幫唔幫到曼聯係一大問題。況且「紅魔鬼」仲有唔少傷兵,尹戈爾隨時又要搵古利姆華利拿同保夫域克積遜兩個出任正選二閘,真係好難畀到人信心喎。

諾域治進步存心偷雞
冇錯,諾域治戰績係曳,不過佢哋近期表現已經有明顯改善,最近仲分別喺阿仙奴同愛華頓身上搶到分,證明呢班波嘅質素唔係咁曳。領隊阿歷士尼爾賽前仲搵兩大護級勁敵做借鏡,指般尼茅夫都可以連挫車仔、曼聯,紐卡素亦連贏利記、熱刺,希望激勵班手足有樣學樣,擺明想喺今晚做單大嘢。適逢曼聯後防唔齊腳,「金絲雀」好波之人羅比巴迪同列特文絕對有機會搵到食,呢場撐硬諾域治。

 

上一篇:基達菲送上門華倫起筷     下一篇:車仔無人駕駛新特蘭頂到半場